حلم... وكلمة

كلمة ليلى طوبال
حالمة المشروع
إحلموا… ما زال للحلم بقية
إحلموا وعينيكم مغمضة… إحلموا وعينيكم محلولة
إحلم… مدّ يدّك للسماء وما تقولش ما ابعدها
قول كان ندبّر صرّافة توّه انمسّ النجوم والقمره بطراطش صوابعي…
إحلم الحلمة إلّي تلبسك… وتلبسها
حلمة منين تتلفّت تراها … تلعب إنت وياها غمّيضة
تتخبى في كرش حوتة تغطس وتلقاها…
إحلم الحلمة إلّي تمسحلك دمعتك كي تبكي
وتحطّك في شونها كي تبدى وحدك
وإدفّيك في ليلة من ليالي البيض
إحلموا حلمة في كبر الـ galaxie
في عنف الطوفان… في قوّة الزلزال
حلمة مهبولة كي هبال عاشق ولهان
إحلم حلمة noir et blanc وإلاّ بالألوان
إحلم حلمة منظمّة مستوية وإلاّ حلمة داخلة قبّة خارجة قيام
المهم إحلم وشدّ صحيح في حلمتك
بيديك وساقيك وضوافرك وسنّيك وما تسلّمش
إحلم وما تخلّي حتى حدّ… ما تخلّي حتى قوّة
ادبّر عليك كيفاش تحلم…
إحلم حتى كان تعرف إلّي حلمتك باش تباصيك
باش تبعثك وراء الشمس
إحلم حتى كان الفاتورة باش تخلّصها عمرك وحياتك
إحلم… نقولها بالصوت العالي حتى تسمعوني
إحلموا
وخلّيو عندكم أمل
نحبّكم…
مقطع من مونودراما سلوان